喺香港被日軍侵佔嘅三年零八個月裡面，日軍曾強制香港人將所有港幣全部兌換成軍票，一旦被發現私下留有港幣嘅人，就會被日軍虐打甚至殺害。後嚟日本戰敗，香港人手上嘅軍票全部變成廢紙，甚至無途徑去追討自己嘅損失。

 日本獨立記者和仁廉夫同多位學者、律師組成「香港軍票補償促進會」，連同香港索償協會一齊協助大概3000個港人向日本法院提出訴訟，尋求日本賠償喺二戰時期佔領香港，並強逼市民兌換軍票所造成嘅損失。經過漫長嘅法律程序，呢宗追討賠償案最終喺2001年被日本最高法院駁回。值得留意嘅係，審理呢單案嘅裁判官同時亦審理另一單中國人受害嘅案件，佢嘅立場係站在中國人一方。不過，因為日本憲法保護當權者,最終案件判處香港人敗訴。而本來向日本追討賠償嘅香港人，反而要被日方追討案件所需嘅文件費用。

案件結束之後，和仁廉夫為賠償案而搜集同整理嘅資料無可能喺日本保存，於是佢將呢批資料包括判案書、訴狀、案情摘要、口述歷史同媒體報道等七箱合共數以千頁嘅文件同十幾盒錄影帶，一併捐贈俾中大圖書館。阿史早兩日有機會參加咗呢個捐贈儀式，可以翻查呢批文件嘅正本，同埋即場聽和仁廉夫講解。如果大家想知多啲呢單案件嘅詳細內容，可以參考和仁廉夫嘅著作《歲月無聲：一個日本人追尋香港日佔史迹》、《日本軍票與戰後補償》。